Պետական գույքի կառավարման կոմիտե
«Հայֆիլմի վերածնունդ» նախաձեռնությունը երկու տարեկան է: Նախաձեռնության անդամները` ի դեմս հիմնադիր ՀԱՅԿ ԲԱԲԱՅԱՆԻ, պետական գույքի կառավարման վարչություն էին տարել տոնական թխվածքն ու «Հայֆիլմը» վերականգնելու ծրագրային փաթեթը:
-Հայկ, ծրագիրը պետք է ներկայացնեիք մշակույթի նախարարությանը, բայց ուղղությունը փոխեցիք դեպի պետական գույքի կառավարման վարչություն: Ինչու՞:
-Պետք է ներկայացնեինք, բայց նախարարի խորհրդականները մեզ ասացին, որ դրա համար կա պետգույք, դիմեք իրենց: Ես տպավորություն ունեմ, որ Նարեկ Բաբայանի հետ համագործակցությունը ավելի արդյունավետ կարող է լինել, իր կողմից ոգևորությունն ու հետաքրքրությունն ավելի ակնհայտ է: «Հայֆիլմի վերածնունդ» նախաձեռնության երկամյակին նվիրված թխվածքը` վրան գրված մեր ծրագրի հիմնական կետերը, տվեցինք պետական գույքի կառավարման վարչությանը, որ և կարդան, և վայելեն տոնական թխվածքը:
-Վարչության պետ Նարեկ Բաբայանն ինչպե՞ս ընդունեց փաթեթն ու նվերը:
-Շատ դրական, ուրախ, զարմացած, անկեղծ ժպիտով: Նաև ասաց, որ եթե նախօրոք տեղեկացնեինք մեր այցի մասին, կգնայինք վարչություն ու կքննարկեինք ծրագրերը: Ես ասացի, որ եթե նախօրոք ասեինք, անակնկալ չէր լինի:
-Հայկ, ձեր առաջարկած ծրագրերն ու տեսլականը գուցե չե՞ն համընկնում «Հայֆիլմի» տնօրենության քաղաքականությանն ու գործելաոճին: Այդ դեպքում ո՞րն է լինելու ձեր առաջին քայլը:
-Մենք առաջարկում ենք կադրերի վերանայում, որովհետև ովքեր ստուդիան ղեկավարում են, ամեն ինչ անում են փակ պատերի հետևում: Ոչ ոք ոչնչից տեղյակ չէ: Հաջորդ քայլը «Հայֆիլմը» ազգայնացնելն ու մասնավորեցման ծրագրից հանելն է, ինչին, որքան գիտեմ, կողմ է նաև Նարեկ Բաբայանը, և արդեն կանցնենք մեր հիմնական ծրագրային կետերին:
-Դա նշանակում է, որ ստուդիան պետք է «վերածնվի» պետությա՞ն միջոցներով:
-Ոչ, մենք առաջին օրվանից ասել ենք, որ պետության վրա ամեն ինչ պետք չէ բարդել: Մեր ծրագրի մեջ կան այն մարդկանց անունները, ովքեր մեր կողքին են, պատրաստ են աջակցելու, հովանավորելու, համագործակցելու: Երբ մենք բոլոր քայլերն անենք, դրանից հետո պետությունը հաստատապես իր մեծ քայլը կանի: Մեր երկրում հազար ու մի խնդիրներ կան լուծելու մինչև «Հայֆիլմը»:
-Կինոոլորտում քանի՞սն են հավատում ձեր գաղափարներին, քանի՞սն են համոզված, որ «Հայֆիլմն» իսպառ կորցրել ենք:
-Մեր կինոգործիչների 90 տոկոսը մտածում է, որ «Հայֆիլմը» կորցրել ենք: Մի քանիսն են մեր կողքին: Բայց մեզ նաև հաճախ ասում են` այդքան որ խոսում եք, ինչու՞ չեք նշում այն մարդկանց անունները, ովքեր ստորագրել են «Հայֆիլմը» մասնավորեցնելու պայմանագրի տակ: Եթե նշենք, հայ կինոյում մի վառ անուն չի մնա:
-Պետգույքի վարչության պաշտոնական պատասխանը ե՞րբ կլինի:
-Մենք առաջիկայում հստակեցնելու ենք մեր աջակիցների տվյալները, նրանց մոտեցումները, քայլերը, որից հետո կհանդիպենք Նարեկ Բաբայանի հետ ու, դրական պատասխանի դեպքում, կանցնենք հստակ քայլերի:
-Հայկ, հասարական հարցերը չե՞ն խանգարում ռեժիսորական աշխատանքիդ:
-Ոչ այնքան: Այս տարի հերթական կարճամետրաժ ֆիլմն եմ ներկայացնելու հայ հանդիսատեսի դատին: Ֆիլմը ազգային հերոս Ռոբերտ Աբաջյանի մասին է: Ռոբերտ Աբաջյանը նաև իմ մանկության ընկերն է, նրա հետ նույն բակում եմ մեծացել: Ֆիլմը շատ կարճ է, եթե նրան չճանաչեի, գուցե երկար լիներ:
